I paraburgosuri që ndërroi jetë sot në Qendrën e Paraburgimit në Lipjan, është Naser Makolli.
Siç merr vesh Telegrafi, Makolli ka qenë edhe ish-cimer dhome me aktivistin e ndjerë të Vetëvendosjes, Astrit Deharin.
Ai ishte transferuar në Qendrën e Paraburgimit në Lipjan pas vdekjes së Deharit, me të cilin e kishte ndarë dhomën e burgut.
Makolli kishte folur për Deharin pas vdekjes së tij. Ai kishte thënë se Dehari ka qenë i sjellshëm dhe i shoqërueshëm.
Ai madje kishte treguar momentin kritikë kur e kishte gjetur të shtrirë për toke Deharin, i cili në gojën e tij kishte pasur një shishe të plastikës.
Naser Makolli ka ndërruar jetë sot në QKMF në Lipjan, edhe pse ishte reanimuar por nuk kishte mundur të mbijetonte.
I ndjeri ka qenë i dyshuari kryesor për vrasjen e 22 vjeçarit nga Suhareka, Egzon Mazreku. Vrasja kishte ndodhur më 27 janar të këtij viti në fshatin Sopi të Suharekës, ku persona të armatosur kishin qëlluar mbi Egzon Mazrekun dhe babanë e tij, Naimin./Telegrafi/
