Kryetari i LDK-së, Isa Mustafa, me rastin e zgjedhjes së deputetit të CDU-së, Peter Beyer si raportues për Kosovën në Këshillin e Evropës ka dërguar një telegram urimi.
Mustafa ka uruar zgjedhjen e Peter Beyer, duke thënë se ky është një lajm i mirë për Kosovën pasi që në vizitën e tij në LDK në shtator të këtij viti, Beyer kishte përsëritur zotimin e tij se do ta mbështesë Kosovën në proceset e ardhshme.
Telegrami i Mustafës:
“Të nderuar qytetarë të Republikës së Kosovës,
Shpreh urimet e mia për mikun tim dhe të Kosovës, z. Peter Beyer për zgjedhjen e tij si raportues për Kosovën në Këshillin e Evropës. Zgjedhja e tij është lajm i mirë dhe tepër me rëndësi për popullin e Kosovës.
Në vizitën e tij më 3 shtator të këtij viti në LDK, z. Beyer ka përsëritur zotimin e tij që ta mbështesë Kosovën në proceset e ardhshme.
Lidhja Demokratike e Kosovës është e lumtur për bashkëpunimin që ka me partinë simotër CDU, prandaj jemi të bindur që edhe z. Beyer do të mbrojë interesat e shtetit tonë”.
Ndryshe deputeti i Bundestagut gjerman, Peter Beyer është zgjedhur raportues i Kosovës në Këshillin e Evropës , gjatë votimit të sotëm në Komitetin për Politikë të Jashtme dhe Demokraci të Asamblesë Parlamentare të Këshillit të Evropës. Ai ka fituar me 33 vota kundrejt Aleksey Kondratyev me prejardhje ruse që mori 6 vota. Kandidimi i Aleksey Kondratyev, kishte ngjallur reagime të shumta.
Instituti i Prishtinës për Studime Politike-PIPS gjatë ditës së djeshme kathënë se mbi 40 organizata të shoqërisë civile kosovare kanë përkrahur letrën e dërguar Këshillit të Evropës, Asamblesë Parlamentare dhe Komitetit për Çështje Politike, duke i bërë thirrje për të parandaluar përzgjedhjen e delegatit rus të Asamblesë Parlamentare, Alexey Kondratyev në pozitën e raportuesit për Kosovën./Telegrafi/