Kryeministri Isa Mustafa ka pritur të martën në takim përfaqësuesit e BSPK-së, të cilët i ka njoftuar mbi buxhetin për vitin 2015 dhe shkurtimet që janë bërë në shpenzime të shumë agjencive buxhetore si dhe shpenzimeve të tjera të Qeverisë me qëllim të krijimit të hapësirës për mbulimin e obligimeve që dalin nga Kontrata Kolektive.
Mustafa theksoi se përkundër dëshirës për të akomoduar kërkesat e sindikatave, “mundësitë aktuale buxhetore janë të limituara”.
Po ashtu, kryeministri edhe një herë theksoi se duhet trajtim i drejtë sektorial i të gjithë punonjësve në Kosovë pasi që aktualisht ka humbur konkurrenca për vende pune në mes të sektorit publik dhe privat.
“Ecuria e pagave do të trajtohet në kontekst të rritjes së buxhetit në të ardhmen”, ka theksuar Mustafa.
Me këtë rast, kryeministri Isa Mustafa i njoftoi përfaqësuesit sindikal mbi aktivitetet që janë duke u ndërmarr për nivelizimin e pagave në të gjitha institucionet publike të Kosovës./Telegrafi/