Kryeministri i Republikës, Isa Mustafa, ka reaguar ndaj deklaratave të fundit të ministrit të Pushtetit Lokal, Lubomir Mariq, pasi ky i fundit kundërshtoi pranimin e Kosovës në FIFA dhe UEFA.
Mariqi, gjatë një interviste për një televizion beogradas, kritikoi edhe punën e qeverisë Mustafa, pjesë e së cilës është vet ai.
“Sa i përket ministrit Mariq, do të bisedoj me të. Deklaratat, disa prej tyre nuk janë në kompetencën e tij dhe në fushën e tij që ai të merret me to. Ato janë politika qeveritare dhe ministrat i kanë punët në fushat e tyre. Ministrat duhet të angazhohen që ta bëjnë punën për fushën në të cilën janë. Gjithsesi, për mua disa prej këtyre deklaratave janë të papranueshme, të cilat do t’ia prezantoj Mariqit dhe nuk do të dëshiroja që më tutje ndonjë prej ministrave të merret me gjëra të tilla”, është shprehur ai.