Kryeministri Isa Mustafa ka kërkuar nga bartësit e institucioneve që të eliminojnë dhe preventojnë çdo formë të korrupsionit dhe të keqpërdorimit të detyrës zyrtare.
Ai përmes një postimi në Facebook, ka thënë se gjatë pjesëmarrjes në konferencën për orientimet strategjike për vetëqeverisje lokale, ka shprehur bindjen se Kosova është njollosur në këtë drejtim, transmeton Telegrafi.
Lexojeni të plotë postimin e Mustafës:
“Gjatë pjesëmarrjes së sotme në konferencën për orientimet strategjike për vetëqeverisje lokale, kërkova nga bartësit e institucioneve që të eliminojmë dhe preventojmë çdo formë të korrupsionit dhe të keqpërdorimit të detyrës zyrtare.
Shpreh bindjen se Kosova është stigmatizuar ose thënë shqip, është njollosur në këtë drejtim. Prandaj, të gjithë duhet të punojmë ta heqim këtë njollë nga ne, të krijojmë kushte që çdo zyrtar të bëjë punën e vet në harmoni me ligjin, që shërbimet dhe investimet që i kryejmë për qytetarët të mos bartin koston e korrupsionit, ta rrisin besimin e çdo qytetari në pushtetin lokal dhe atë qendror.
Ne kemi për obligim të ndikojmë që ta ndryshojmë edhe kulturën shtetërore, kulturën e dyshimit në bartësit e pushtetit, ta transformojmë në kulturë të besimit, por edhe të kërkimit të përgjegjësisë.
Unë jam i bindur se ne mundemi që bashkërisht ta arrijmë këtë!”, ka shkruar Mustafa në Facebook. /Telegrafi/