Mustafa ka deklaruar se ky Kuvend vjen si pasojë e zhvillimeve politike brenda PD-së. Ai thotë se një pjesë e vogël e kryesisë së partisë bashkë me kryetarin Ferid Agani, kanë shkelur disa vendime të Kryesisë Qendrore, Këshillit Drejtues dhe Kuvendit të Punës që është mbajtur më 29 maj, përfshirë këtu edhe vendimin për Demarkacionin.
Mustafa ka pohuar se zgjedhja e kryetarit të ri, nuk ka të bëjë me ndryshimin e kursit politik të PD-së, siç i ka akuzuar Agani nga parti konservatore e qendrës së djathtë, me politika në kundërshtim me traditën e popullit shqiptar.
“Ne jemi për të mbrojtur fuqishëm dhe për të çuar përpara programin e Partisë së Drejtësisë dhe nuk bëhet fjalë për ndryshim të kursit politik. Ka të bëjë me pozicionin e Partisë së Drejtësisë, nga një lojalitet i rëndësishëm në skenën politike është kthyer në një subjekt që do t’ju mundësoj partnerëve të mëdhenj që të fitojnë zgjedhjet dhe jemi vazhdimisht pjesë e matematikave politike, por kurrsesi pjesë e artikulimit të mendimeve politike”, është shprehur Mustafa.
Ai ka thënë se vazhdon të jetë Sekretar i Përgjithshëm i PD-së, përkundër që nga Agani po konsiderohet si uzurpues i këtij posti.
“Unë jam Sekretar i Përgjithshëm i partisë që kam marr votat e 94 anëtarët e Këshillit të Përgjithshëm. Nuk qëndron pezullimi im, sepse sipas statutit, kryesia e partisë nuk mund të marr vendime për pozitat politike të partisë, por vetëm Këshilli Drejtues dhe kjo nuk ka ndodhur në rastin tim, por në mbledhjen që zotëri Agani pretendon se ka marr këtë vendim, nuk ka pas as kuorum”, ka deklaruar Mustafa. /lajmi.net/