Kryetari i Lidhjes Demokratike të Kosovës, Isa Mustafa, ka reaguar edhe një herë lidhur me zhvillimet e sotme në familjan Rugova, ku mysafir ishte i nominuari i koalicionit PAN për kryeministër, Ramush Haradinaj.
Mustafa, përmes një postimi në facebook, ka bërë të ditur se deputetët e LDK-së nuk do ta japin votën për Qeverinë e koalicionit të drejtuar nga PDK-ja.
“Mos na lodhni duke na treguar sesi ua dha Rugova mandatin. Sot nuk do t’ua japim as mandatin e as besimin. Asnjë nga LDK, që respekton LDK-në dhe që i rri besnik kësaj partie nuk do t’ia jap votat koalicionit të drejtuar nga PDK e as Ramush Haradinajt me PDK-në”, ka thënë Mustafa, transmeton Telegrafi.
Postimi i plotë i Mustafës:
“Asnjë nga LDK, që respekton LDK-në dhe që i rri besnik kësaj partie nuk do t’ia jap votat koalicionit të drejtuar nga PDK e as Ramush Haradinajt me PDK-në.
Ata që e sulmuan me të gjitha mjetet dhe metodat e dhunës Kryeministrin dhe Qeverinë e drejtuar nga LDK, sot thirren në Ibrahim Rugovën dhe kërkojnë nga LDK dhe deputetët e LDK-së t’ua japin votën për Qeverinë e koalicionit të drejtuar nga PDK.
Me çfarë të drejte? Morale? Politike? Etike?
AAK, Nisma, VV, Lista Serbe, komunitetet tjera, të gjithë u bashkuat për ti shpallur mosbesim një qeverie të drejtuar nga LDK që shënoi rritje ekonomike, stabilizoi buxhetin, rriti pensionet, e pa korruptuar me orientim të qartë evropian.
Ne nuk jemi përgjegjës që gabuat në llogari.
Prandaj, mos na lodhni duke na treguar sesi ua dha Rugova mandatin. Sot nuk do t’ua japim as mandatin e as besimin. Asnjë nga LDK, që respekton LDK-në dhe që i rri besnik kësaj partie nuk do t’ia jap votat koalicionit të drejtuar nga PDK e as Ramush Haradinajt me PDK-në.
LDK nuk do të diskutoj me askënd për qeverisjen PAN. Si lider i LDK-së nuk do të marr pjesë as në takimin e ftuar nga Presidenti, sepse konsideroj që takimet e tilla janë të panevojshme dhe se ato po krijojnë hapësirë për huti dhe konfuzion dhe për të blerë kohë për manipulime të ulëta me deputet nga njerëz të caktuar të PAN-it dhe shërbëtorë të tyre. IM” (sic), shkruan Mustafa. /Telegrafi/