Kryetari i Lidhjes Demokratike të Kosovës, Isa Mustafa, ka mirëpritur sot në një takim delegacionin e FCO të Britanisë së Bashkuar të përbërë nga Shefi i Departamentit për Ballkanin Perëndimor, Andrew Page dhe Susan Laffey, Zyrtare e Lartë e Sektorit të Analizës si dhe Ambasadori O’Connell.
Në njoftimin e bërë për media nga LDK bëhet e ditur se, gjatë takimit është diskutuar për situatën aktuale në vend, dialogun Kosovë-Serbi, zgjedhjet e parakohshme në Kosovë, zgjedhjet e brendshme të LDK-së dhe programin zhvillimor të LDK-së në qeverinë e ardhshme në fushat e ekonomisë, arsimit, shëndetësisë, etj.
Kryetari Mustafa ka falënderuar delegacionin britanik për kontributin dhe përkrahjen e Britanisë së Bashkuar dhe ambasadës së saj në Kosovë gjatë të gjitha proceseve shtetformuese në Kosovë këto tri dekadat e fundit.
Të pranishëm në takim ishin edhe nënkryetari i LDK-së, Agim Veliu, sekretari i përgjithshëm, Ismet Beqiri, anëtarja e Kryesisë Vlora Dumoshi dhe zëdhënësi Besian Mustafa./Telegrafi/
