Pronari i ri i Twitterit, Elon Musk, ngriti të enjten mundësinë e falimentimit të platformës së mediave sociale, duke mbyllur një ditë kaotike që përfshinte një paralajmërim nga një rregullator amerikan i privatësisë dhe largimin e liderit të besimit dhe sigurisë së kompanisë.
Miliarderi në bisedën e tij të parë masive me punëtorët tha se ai nuk mund të përjashtonte falimentimin, raportoi Bloomberg News, dy javë pasi e bleu atë për 44 miliardë dollarë – një marrëveshje që ekspertët e kreditit thonë se i ka lënë financat e Twitter në një pozitë të pasigurt, transmeton Telegrafi.
Më herët gjatë ditës, në emailin e tij të parë në të gjithë kompaninë, Musk paralajmëroi se Twitter nuk do të jetë në gjendje të “i mbijetojë rënies ekonomike të ardhshme” nëse nuk arrin të rrisë të ardhurat nga abonimet për të kompensuar rënien e të ardhurave nga reklamat, thanë për Reuters tre persona që e kanë parë mesazhin.
Ndryshe, pas finalizimit të marrëveshjes për blerjen e Twitterit, Musk mori një seri vendimesh në kompani, duke pushuar nga puna gjysmën e fuqisë punëtore, përfshirë edhe drejtues të lartë.
Musk madje i tha stafit se nuk do të mund të punojnë më nga shtëpia. /Telegrafi/