Robin Wheeler, shefja e shitjeve të reklamave në Twitter, duket se është larguar sërish nga kompania, pak më shumë se një javë pasi Elon Musk thuhet se duhej ta bindte atë të mos jepte dorëheqjen.
Të premten në mbrëmje, Casey Newton i Platformer raportoi se Wheeler ishte shkarkuar nga kompania, megjithëse detajet se pse janë aktualisht të paqarta.
Menjëherë pas kësaj, vetë Wheeler shkroi në Twitter: “Për ekipin dhe klientët e mi… ju ishit gjithmonë prioriteti im i parë dhe i vetëm”, shkrim ky i ndjekur nga emoji përshëndetës, emoji i cili është bërë një shenjë e tregimit të largimit nga kompania, transmeton Telegrafi.
To the team and my clients….you were always my first and only priority. 🫡
— Robin Wheeler (@robinw) November 19, 2022
Ajo nuk iu përgjigj menjëherë kërkesës së The Verge për konfirmim se ishte shkarkuar, dhe në fakt Twitter nuk ka një departament komunikimi për të pranuar kërkesa të tilla.
Është vetëm kthesa e fundit në historinë e drejtuesve të shitjeve të reklamave në Twitter. Në fillim të këtij muaji, ekzekutivi më i lartë i reklamave, Shefja e Klientit Sarah Personette, dha dorëheqjen.
Më pas, më 10 nëntor, u raportua se Wheeler, atëherë zëvendëspresidente i zgjidhjeve të klientëve në SHBA, kishte dhënë dorëheqjen së bashku me kreun e besimit dhe sigurisë Yoel Roth, por Musk e kishte bindur që të qëndronte. Dhe duket se periudha e mbajtjes së saj në kompani ishte shumë e shkurtër.
Paqëndrueshmëria e Twitter, së bashku me disa faktorë të tjerë, nuk i ka bërë të lumtur reklamuesit e platformës. Tre nga firmat më të mëdha të reklamave kanë paralajmëruar klientët e tyre që të mos zhvillojnë fushata në faqe. Humbja e kreut të shitjeve të reklamave dy herë brenda dy javësh mund të mos ndihmojë në këtë aspekt.
Twitter ka humbur një pjesë të madhe të drejtuesve dhe stafit të tij. Kur Musk mori detyrën, ai shkarkoi disa zyrtarë të lartë, duke përfshirë edhe drejtorin ekzekutiv, dhe disa të tjerë kanë dhënë dorëheqjen që atëherë.
Ai gjithashtu pushoi nga puna mijëra punëtorë dhe kontraktorë, më pas u dha njerëzve të lënë zgjedhjen të pranonin të punonin në një Twitter 2.0 “hardcore” ose të merrnin një paketë pushimi nga puna, ndërsa The Verge raporton se kanë marrë vesh se qindra punëtorë kanë zgjedhur të marrin paratë dhe të largohen. /Telegrafi/