Miliarderi Elon Musk, disa ditë pasi dha një ide se si mund të përfundonte lufta midis Rusisë dhe Ukrainës duke tërhequr paralele aspak logjike mes Kosovës dhe Serbisë, sugjeroi se tensionet midis Kinës dhe Tajvanit mund të zgjidheshin duke i dorëzuar një pjesë të kontrollit të Tajvanit në Pekin.
“Rekomandimi im do të ishte të gjendej një zonë e posaçme administrative për Tajvanin. Ndoshta kjo nuk do t’i bënte të gjithë të lumtur”, tha Musk, personi më i pasur në botë.
Ai i bëri këto komente kur u pyet nga gazeta për Kinën, ku kompania e tij e veturave elektrike Tesla (TSLA.O) ka një fabrikë të madhe në Shangai, raporton reuters.
Pekini, i cili thotë se Tajvani i sunduar në mënyrë demokratike është një nga provincat e tij, është zotuar prej kohësh të vendosë Tajvanin nën kontroll dhe nuk e ka përjashtuar përdorimin e forcës për ta bërë këtë.
Qeveria e Tajvanit kundërshton me forcë pretendimet e Kinës për sovranitet dhe thotë se vetëm 23 milionë banorët e ishullit mund të vendosin për të ardhmen e tij.
“Dhe është e mundur, dhe unë mendoj se ndoshta, në fakt, ata mund të kenë një marrëveshje që është më e butë se Hong Kongu”, citohet të ketë thënë Musk.
Kina i ka ofruar Tajvanit një model autonomie “një vend, dy sisteme” të ngjashëm me atë që ka Hong Kongu, por që është refuzuar nga të gjitha partitë kryesore politike në Tajvan dhe nuk ka mbështetje publike, veçanërisht pasi Pekini vendosi një ligj të ashpër të Sigurisë Kombëtare në vitin 2020.
Ministria e Jashtme e Tajvanit nuk pranoi të komentojë komentet e Musk, por një zyrtar i lartë tajvanez i njohur me planifikimin e sigurisë në rajon i tha Reuters se “Musk duhet të gjejë një këshilltar politik me kokë të qartë”. /Telegrafi/