Mungesa e stafit mjekësor ka prekur edhe Repartin e Anesteziologjisë në QKUK.
Drejtori i këtij reparti, Nehat Baftiu, në një prononcim për emisionin “Zyra e Ankesave”, në RTV Dukagjini, ka thënë se QKUK ka mungesë të anesteziologëve, dhe sipas kërkesave momentale duhen së paku 100 të tillë.
“Po kemi mungesë të anesteziologëve, dhe këtë e dinë të gjitha strukturat e QKUK-së. Sipas një vlerësimi të bërë në vitin 2001, kur kapacitetet punuese ishin shumë më të vogla duheshin 75 anesteziologë, ndërsa sot me kapacitet shumë më të mëdha, duhen së paku 100 anesteziolog”, ka thënë Baftiu, transmeton Telegrafi.
Drejtori Baftiu, tha se në universitet kanë diplomuar rreth 150 anesteziologë, por të gjithë kanë gjetur punë.
“Kanë diplomuar rreth 150 anesteziologë dhe reanimatorë, por për rrogë më të mirë, kushte më të mira, të gjithë janë punësuar jashtë. Këtu kemi mbet rreth 50, por pasi disa shkojnë në pushime të lindjes ose pushime tjera, asnjëherë nuk mbesim më shumë se 45”, ka shtuar më tej Nehat Baftiu. /Telegrafi/
