Sot është dita e fundit ku qytetarët dhe organizatat mund të dërgojnë ankesat dhe komentet e tyre lidhur me paralajmërimin e Zyrës së Rregullatorit të Energjisë për shtrenjtimin e energjisë elektrike për 15 për qind.
Njohësi i çështjeve ekonomike, Shenoll Muharremi ka reaguar sot, duke thënë se po pranon përsëri mesazhe nga qytetarët, profesionistët dhe organizatat të cilët nuk po arrijnë me i dërgu komentet dhe reagimet e tyre te ZRRE.
“Tani po pranojmë përsëri mesazhe nga qytetarët, profesionistët dhe organizatat të cilët nuk po arrijnë me i dërgu komentet dhe reagimet e tyre te ZRRE. Email i tyre që duhet me i pranu konsultimet NUK PO FUNKSIONON. Kjo sot nuk është hera e parë që sistemi është i bllokuar nuk pranon reagimet konstruktive dhe profesionale.
Kjo e komprometon procesin e konsultimit nga ZRRE.. i cili aktualisht është i bllokuar. Gjithashtu i konfirmon dyshimet që rregullatori nuk ka qenë transparent dhe nuk ka treguar vullnet me dialogu me publikun për vendimet e tyre”, shkruan ai.
Tutje, Muharremi thekson se Zyra e Rregullatorit duhet të përgatitet më mirë për konsultime.
“Nëse njerëzit vazhdojnë me dërgu fakte që reagimet e tyre nuk po pranohen, ZRRE duhet me përsëritë procesin e konsultimeve. Gjithashtu duhet me organizu sesione informative cilësore me publikun dhe gazetarët për me i njoftu rreth propozimeve të tyre”, shkruan Muharremi. /Telegrafi/
