Spitali i Përgjithshëm në Pejë po vazhdon përpjekjet e tij për të ngritur vetëdijen mbi kancerin e gjirit, sëmundje kjo që prek një numër të madh të grave në mbarë botën.
Si pjesë e aktiviteteve të shënimit të muajit të vetëdijesimit, spitali ofron mundësinë që të gjitha gratë të kryejnë mamografi falas gjatë muajit tetor, duke e bërë më të lehtë diagnostikimin e hershëm të sëmundjes dhe duke ndihmuar në përmirësimin e kujdesit shëndetësor për gratë.
Në një postim në Facebook, Spitali i Përgjithshëm i Pejës bëri të ditur se, sikurse vitet e kaluara, edhe këtë vit do të ofrojë shërbime të mamografisë pa pagesë për gratë.
“Në vitet e mëparshme, mbi 120 gra e kanë shfrytëzuar këtë mundësi vetëm gjatë muajit tetor. Spitali fton të gjitha gratë që të mos hezitojnë të kryejnë këtë shërbim, i cili ofrohet çdo ditë pune nga ora 7:00 deri në 13:00, në Kabinetin e Radiologjisë që ndodhet në katin e parë tek Ambulancat Specialistike”, kanë shkruar ndër të tjera ata.
Për të kryer mamografinë, pacientet duhet të kenë udhëzim nga mjeku, por nuk do të ketë asnjë kosto financiare për këtë shërbim.
