Ministria për punë dhe politikë sociale i vlerëson si të pavërteta pretendimet e Konfederatës së sindikatave të lira në lidhje me shkeljen e procedurës për sjelljen e Ligjit për pagë minimale dhe informon se përfaqësuesit e KSL janë ftuar rregullisht në seancat e Këshillit ekonomik-social, në të cilat seanca janë debatuar çështjet e këtij ligji, por përfaqësues të KSL nuk kanë marrë pjesë, përcjell Telegrafi Maqedoni.
“Duke i pasur parasysh kompetencat e definuara të Këshillit ekonomik-social sipas Ligjit për marrëdhënie pune dhe marrëveshjen për themelim të KES në vitin 2010, u ftua seancë e KES nga ana e Ministres për punë dhe politikë sociale dhe kryesuese e KES, Milla Carovska, më 18.07.2017, ku në rend dite u vendos propozim Ligji për ndryshim dhe plotësim të Ligjit për pagë minimale”, thuhet në reagimin e MPPS ndaj konferencës për shtyp të Konfederatës së sindikatave të lira./Telegrafi/