Ministria e Punëve të Jashtme dhe Diasporës ka njoftuar se sot (enjte) Prokuroria e Qarkut të Beogradit ka dhënë leje për tërheqjen e trupit të pajetë të qytetarit të Kosovës, i raportuar si i vrarë në Lloznicë të Serbisë.
“Avokati i familjes Hajrizi, Arianit Koci, mbështetur nga Zyra Ndërlidhëse e Kosovës në Serbi, Ambasadori Jashari po kryejnë procedurat e tërheqjes së trupit të pajetë të shtetasit të Kosovës nga morgu i Lloznicës për ta sjellë në Kosovë”, njofton MPJD.
Rreth procedurave të mëtutjeshme mjeko-ligjore të identifikimit dhe verifikimit të trupit të pajetë të shtetasit të Kosovës, nga institucionet e Republikës së Kosovës, MPJD thotë se do t’i mbajnë të informuar.
Ndryshe avokati Arianit Koci ka shkruar se ka përfunduar me sukses misionin për konfirmimin e identitetit të trupit të pajetë të Faton Hajrizit.
“Misioni u krye me sukses! Nuk ishte i lehtë. Aspak”, ka shkruar në Facebook avokati i familjarëve të Faton Hajrizit, Arianit Koci.
Hajrizi, i arratisur nga një burg në Kosovë, sipas autoriteteve serbe vrau një polic serb dhe plagosi një tjetër në orët e para të 18 korrikut në Lloznicë, qytet në pjesën perëndimore të Serbisë.
Ai dyshohet se kishte udhëtuar nëpër Serbi me dokumentet e vëllait të tij, Artani është paraqitur para autoriteteve në Gjermani – ku dhe jeton- dhe ka thënë se i vëllai, Fatoni ia kishte vjedhur pasaportën gjatë kësaj jave në Gjermani.
Megjithatë, nuk është konfirmuar nëse Fatoni ka qenë në Gjermani.
Ndërkaq, Serbia ka kërkuar që Gjermania të ekstradojë vëllain e Fatonit, Artanin, pasi në vendin e ngjarjes, u gjetën dokumente në emër të tij./Telegrafi/
