Ministria e Punëve të Brendshme (MPB) e Kosovës ka thënë se i arrestuari në Maqedoninë e Veriut, Sedat Peker, nuk ka shtetësi kosovare.
MPB thotë se ai ka vetëm leje-qëndrimi në Kosovë nga viti 2014 dhe ka një biznes të regjistruar në emrin e tij në Prizren.
Mediat maqedonase gjatë ditës raportuan se ai u arrestua atje për thyerje të rregullave të qëndrimit, por se u deportua në Kosovë. Po ashtu, u raportua se ai dyshohet për vepra të shumta penale.
“Ministria e Punëve të Brendshme mund të konfirmoj se personi në fjalë nuk posedon pasaportë kosovare, siç është raportuar, por i njëjti posedon vetëm leje qëndrimi të përkohshëm, në emër të një biznesi të regjistruar në Prizren, nga viti 2014 dhe të vlefshëm deri më 29/12/2021”, thotë Ministria e Brendshme.
“Mund të ju informojmë se z. Peker, ka hyrë në Republikën e Kosovës në mënyrë të ligjshme me datë 18/01/2021 dhe ka dalë nga Republika e Kosovës në drejtim të Republikës së Shqipërisë me datë 20/01/2021”.
Ndërkaq, Ministria e Brendshme e Maqedonisë së Veriut ka thënë shkurt arsyen pse u arrestua pa dhënë detaje të tjera.
“Më 18.01.2021 zyrtarë policorë nga Biroja për Siguri Publike kanë arrestuar R.S.P. 49 vjeçar, i cili ka qëndruar në vendin tonë, ndërkohë që ka shkelur rregullat për qëndrim të shkurtër. Pas konstatimit për shkelje të afatit të qëndrimit, personi në fjalë është dëbuar nga territori i Republikës së Maqedonisë së Veriut”, thuhet në kumtesën e MPB./Telegrafi/