Ministria e Punëve të Brendshme njofton se reformat e bëra në administratën publike i kanë sjell Kosovës mbi 9 milionë euro nga Komisioni Evropian.
Sipas MPB-së, kjo shumë është ndarë në kuadër të Kontratës së Reformës Sektoriale për Reformat e Administratës Publike.
“Puna e Qeverisë së Kosovës, në kuadër të Kontratës së Reformës Sektoriale për Reformat e Administratës Publike në vitin 2018 dhe vitin 2019 rezultoi me mbi 9 milionë euro që janë disbursuar drejtpërdrejt në Thesarin e Shtetit”, thuhet në njoftim.
Që nga viti 2018, Qeveria e Kosovës zbaton Kontratën e Reformës Sektoriale për Reformën e Administratës Publike, e cila është nënshkruar me Komisionin Evropian në vitin 2017.
Qëllimi i kësaj kontrate është të mbështesë procesin e reformës në administratën e Kosovës me qëllim të rritjes së përgjegjësisë, transparencës dhe efektivitetit të administratës publike, me fokus më të madh në nevojat e qytetarëve dhe bizneseve. /Telegrafi/