Administrata Kombëtare e Arkivave dhe Regjistrimeve (NARA) muajin e kaluar mori 15 kuti me të dhëna të Shtëpisë së Bardhë që ishin dërguar në shtëpinë turistike Mar-a-Lago të ish-presidentit Donald Trump në vend të Arkivave Kombëtare siç kërkohet me ligj.
Sipas mediave të huaja, përcjell Telegrafi, dokumentet përfshijnë një letër drejtuar Trump nga paraardhësi i tij, presidenti Barack Obama, si dhe “letrat e dashurisë” nga Trump me diktatorin koreano-verior Kim Jong Un, sipas The Washington Post, i cili raportoi fillimisht veprimet e Arkivit Kombëtar, duke cituar njerëz të njohur me të dhënat.
Në një deklaratë për NBC News të hënën pasdite, Arkivi Kombëtar konfirmoi se organizoi transportin e 15 kutive me dosje presidenciale nga rezidenca e Trump në Palm Beach, Florida, në mes të janarit “pas diskutimeve me përfaqësuesit e presidentit Trump në vitin 2021”.
Përfaqësuesit e Trump “kanë informuar NARA-n se po vazhdojnë të kërkojnë për të dhëna shtesë presidenciale që i përkasin Arkivit Kombëtar”, thuhet në deklaratë.
Të gjitha këto të dhëna duhet të ishin dorëzuar në Arkivin Kombëtar direkt nga Shtëpia e Bardhë pasi Trump të largohej nga detyra në janar 2021, siç kërkohet nga Akti i të dhënave presidenciale, vuri në dukje agjencia.
Ai ligj “urdhëron që të gjitha të dhënat presidenciale duhet të ruhen siç duhet nga çdo administratë, në mënyrë që një grup i plotë të të dhënave presidenciale të transferohen në Arkivin Kombëtar në fund të Administratës”, tha në deklaratë Arkivisti i SHBA-së, David Ferriero.
Një zëdhënëse e Trump nuk i është përgjigjur menjëherë kërkesës së CNBC për koment.
Ndërsa këshilltarët e Trump mohuan për The Washington Post se kishte ndonjë qëllim të keq pas transferimit të të dhënave të Shtëpisë së Bardhë në Mar-a-Lago. /Telegrafi/