Për tërmetin e fuqishëm në Shqipëri një kontribut të madh është duke e dhënë edhe këngëtarja e modelja e njohur nga Peja, Morena Taraku.
Bukuroshja, e cila prej kohësh jeton dhe vepron në Turqi, në vazhdimësi po i bën thirrje ndjekësve të saj për të kontribuuar, gjë të cilën e ka bërë edhe vetë.
Pas donacioneve në vlera monetare përgjatë dy ditëve që lamë pas, ajo ka vazhduar sërish.
E njëjta përmes platformës GoFund ka bartur sot nga xhirollogaria e saj plot 1,100 dollarë apo (1000 euro), siç e ka zbuluar vetë përmes rrjeteve sociale.
“Unë e bëra prapë, bëje edhe ti”, ka qenë përshkrimi që ia ka vënë këtij imazhi, ndërkohë që fton të gjithë të tjerët t’i bashkohen kësaj iniciative.
Përveç Morenës, Mozzik dje bashkë me fondacionin e krijuar nga “Fundjavë Ndryshe” kanë grumbulluar mbi një milion dollarë për të prekurit nga tërmetet.
Capital T po ashtu qëndroi gjatë gjithë kohës atje dhe në Kosovë sistemoi afro 200 persona, madje së fundmi njoftoi se nuk ka nevojë më për ndihma pasi kanë filluar të keqpërdoren nga të tjerët.
Sakaq, Thumana dhe Durrësi janë shkatërruar nga tërmeti i fortë me magnitudë 6.4 që tronditi vendin në orën 04:00 të mëngjesit të 26 nëntorit. Deri më tani kanë mbetur 41 persona të vdekur e mbi 650 të tjerë u lënduan dhe shumë nga të mbijetuarit u strehuan në Kosovë. /Telegrafi/