Milani nuk ka arritur më shumë se një barazim pa gola 0-0 ndaj AEK Athinës në kuadër të Ligës së Evropës.
Në tri ndeshjet e fundit ‘Rossonerët’ nuk kanë shënuar fitore, duke humbur dy ndeshje në Serie A.
Trajneri i Milanit, Vincenzo Montella ka thënë se është një moment i vështirë.
“Është një moment i vështirë për t’u shpjeguar. Krijuam shumë raste, por nuk mundëm të shënonim. Vërshëllimat? Mendoj se janë për rezultatin, jo për mënyrën sesi kemi luajtur. I kërkoj shoqërisë, por edhe tifozëve të na qëndrojnë pranë”.
“Kam një marrëdhënie direkte me Mirabellin. Jemi përgjithësisht mirëkuptues me njëri-tjetrin, por nuk jam dakord me të kur thotë se kundër Interit as nuk zbritëm në fushë”.
Italiani thotë se dëshirojnë të gjithë të shohin spektakël dhe beson se skuadra e tij do të përmirësohet në të ardhmen.
“Sigurisht që të gjithë dëshirojmë të shohim spektakël për 95 minuta, por unë e di që kjo skuadër do të përmirësohet ndeshje pas ndeshjeje, derisa të arrijë formën optimale”.
Në fund ish-trajneri i Fiorentinës ka thënë se shumë nga lojtarët e tij nuk kanë veshur më parë fanellë kaq të rëndë sa të Milanit.
“Shumë lojtarë nuk e kanë veshur kurrë më parë një fanellë kaq të rëndë, prandaj kanë nevojë për mbështetje”, deklaroi Montella. /Telegrafi/