Milani ka arritur një fitore tejet të vështirë në udhëtim te Sassuolo.
Kuqezinjtë triumfuan 0-1 falë një goli nga penalltia e sulmuesit kolumbian Carlos Bacca.
Trajneri i Milanit, Vincenzo Montella e ka pranuar se në këtë takim ka pasur shumë episode edhe në favorin e Milanit.
“Ka pasur shumë raste të kontestueshme në këtë ndeshje, disa prej tyre janë dhënë në favorin tonë, por ka qenë një ndeshje shumë e tensionuar, më shumë se sa duhej dhe çdo vendim është shoqëruar me protesta”, ka thënë Montella.
Italiani ka thënë se duhet t’i lënë më të qetë gjyqtarët ta kryejnë punën e tyre.
“Mendoj se duhet t’i japim më shumë frymëmarrje gjyqtarëve dhe t’i lejojmë të bëjnë gabime. Nëse do të zbatohej rregullorja me përpikëri, atëherë duhet thënë se në rastin e penalltisë së Baccas ka qenë dy lojtarë të Sassuolos në zonën e rreptësisë para se ai të godiste”.
“Ne kemi krijuar raste, ashtu si Sassuolo, mua nuk më ka pëlqyer ndeshja sepse ka qenë shumë e tensionuar. E njëjta gjë ka ndodhur në tetor kundër Sassuoloss, na vjen keq, por këto kanë qenë dy ndeshjet e vetme ku gjërat kanë shkuar në favorin tonë”, është shprehur Montella. /Telegrafi/