Kryetari i PSD-së, Dardan Molliqaj e ka cilësuar si katastrofë përmbajtjen e draftit të Asociacionit, i cili u bë publik nga ish- inspektori i Përgjithshëm i Agjencisë së Kosovës për Inteligjencë (AKI), Burim Ramadani.
Molliqaj në një postim në Facebook, ka shkruar se ky draft është i frikshëm.
“E lexova Draftin e Asociacionit të publikuar nga Burim Ramadani. Nga shumë burime po del që ky është drafti që iu është prezantuar palëve, është i frikshëm”, ka shkruar Molliqaj.
Ai tutje është shprehur se ai gjithashtu e gjymton funksionimin e shtetit.
“E gjymton funksionimin e shtetit dhe perspektivën e shoqërisë. Asnjë asociacion nuk është i mirë, por ky që u publikua sot është katastrofë”, është shprehur Molliqaj.
Burim Ramadani ka thënë se ky draft është shumë i gjerë dhe i thellë, ndërsa ka shtuar se “Kosova duhet të fitojë diçka seriozisht të madhe si parakusht për zbatim të këtij dokumenti”.
“Serioz në kompetencat që ia atribuon Asociacionit, por mbi të gjitha shumë serioz në mundësinë që ia jep Serbisë që të funksionojë brenda Kosovës. Dhe kjo sidomos në arsim dhe shëndetësi, kujdes social, në financim dhe donacione, e të ngjashme”, ka shkruar ai.
Draftin e plotë të përkthyer në gjuhën shqipe e gjeni KËTU. /Telegrafi/
