Luka Modric, Cristiano Ronaldo dhe Mohamed Salah, janë në garë për Futbollistin më të mirë të vitit nga UEFA.
Tre lojtarët janë nominuar nga UEFA për lojtarin më të mirë, çmimi që do të ndahet më 30 gusht (e enjte) në një eveniment në Monako.
Fituesi do të shpallet së bashku me Futbollisten më të mirë të vitit sipas UEFA-s dhe lojtarët më të mirë në pozitat e tyre. Një ditë më pas do të shpallet lojtari më i mirë i sezonit në Europa League.
Tre të nominuarit
Luka Modric (Real Madrid dhe Kroaci)
Fitues i Ligës së Kampionëve, finalist në Kampionatin Botëror dhe fitues i Topit të Artë në Botëror.
Cristiano Ronaldo (Real Madrid/Juventus dhe Portugali)
Fitues i Ligës së Kampionëve për një rekord prej pesë triumfesh dhe golashënues më i mirë i Ligës së Kampionëve për të gjashtën herë.
Mohamed Salah (Liverpool dhe Egjipt)
Finalist i Ligës së Kampionëve dhe thyes i shumë rekordeve në sezonin e tij të parë te Liverpooli.
Çfarë është çmimi i UEFA-s për Lojtarin e vitit
Ky çmim vlerëson lojtarët më të mirë nga sezoni paraprak, pavarësisht kombësisë, të cilët luajnë në një klub brenda territorit të UEFA-s. Lojtarët vlerësohen nga paraqitjet e tyre në të gjitha garat – vendore, kontinentale dhe ndërkombëtare.
Lista e ngushtë prej tre futbollistëve është zgjedhur nga një juri që përbëhej prej 80 trajnerëve të klubeve pjesëmarrëse në fazën grupore të edicionin 2017/2018, në Ligën e Kampionëve (32) dhe Europa League (48),së bashku me 55 gazetarë të zgjedhur nga grupi European Sports Media (ESM), që përfaqësojnë një nga federatat anëtare të UEFA-s.
Anëtarët e jurisë i kanë zgjedhur top-tre lojtarët e tyre duke i dhënë të parit – pesë pikë, të dytit – tri pikë dhe të tretit – një pikë. Trajnerët nuk kanë mundur të votojnë për lojtarët në ekipet e tyre.
Lista e ngushtë për çmimet tjera
Portieri i sezonit: Alisson Becker, Gianluigi Buffon, Keylor Navas.
Mbrojtësi i sezonit: Marcelo, Sergio Ramos, Raphael Varane.
Mesfushori i sezonit: Kevin De Bruyne, Toni Kroos, Luka Modric.
Sulmuesi i sezonit: Lionel Messi, Cristiano Ronaldo, Mohamed Salah.
Futbollistja më e mirë e vitit: Pernille Harder, Ada Hegerberg, Amandine Henry.
Lojtari më i mirë i Europa League: Diego Godin, Antoine Griezmann, Dimitri Payet.
Njëherësh, është duke vazhduar edhe votimi për golin më të mirë të sezonit, sipas UEFA-s, ndërsa fituesi do të shpallet më 27 gusht (e hënë). /Telegrafi/