Manekinia atraktive ruse, Sasha Luss, deri më tani i ka pushtuar pistat e modës, ndërsa së shpejti do ta tregojë edhe aftësinë e saj për të aktruar në filmin e zhanrit aksion-triller, “Anna”.
Realizimi i ri i regjisorit dhe skenaristit të njohur, Luc Besson, do të nisë shfaqjen nëpër kinema në muajin qershor, ndërsa sjell tregimin për Annan, e cila punon për qeverinë si vrasëse profesioniste.
Pikërisht rolin e saj e luan Sasha, e cila vjen me rol të rëndësishëm në debutimin e saj filmik.
“Nën bukurinë imponuese të Anna Poliatovas qëndron sekreti që do ta lirojë fuqinë dhe aftësinë e saj për t’u bërë një prej vrasëseve më të frikshme të qeverisë”, thuhet në përshkrimin e filmit.
Krahas Luss, në këtë film luajnë edhe Helen Mirren, Luke Evans, Cilliam Murphy, Lera Abova, Alexander Petrov dhe shumë të tjerë. /Telegrafi/
