Ministrja e MKRS-së, Vlora Dumoshi, përmes një video-adresimi, në Ditën Ndërkombëtare të Monumenteve dhe Lokaliteteve, ka njoftuar se është përgatitur një model 3D të restituimit të Parkut Arkeologjik “Ulpiana”.
“Siç ka qenë traditë për disa vite, vendi ynë e ka mbajtur aktivitete të ndryshme me rastin e kësaj dite dhe në bashkëpunim me shumë institucione dhe akterë tjerë të rëndësishëm. Megjithatë, MKRS-ja për mos ta harruar shënimin e kësaj dite, ka përgatitur një 3D model të restituimit të Parkut Arkeologjik Ulpiana. Ky model është mbështetur financiarisht nga organizata UNDP, në bashkëpunim me Institutin Arkeologjik të Kosovës”, thuhet në njoftim. “Ministria e Kulturës, Rinisë dhe Sportit, me urimin që situata me të cilën po kalojmë në Kosovë dhe me të cilën po përballet i tërë globi, të kalojë sa më parë, në të njëjtën kohë MKRS ju bën thirrje që të kujdesemi më tepër për ata që i kemi përreth, të rrisim përgjegjësitë tona për mbrojtjen, ruajtjen dhe promovimin e trashëgimisë kulturore”.
