Kur kishte shprehur dëshirën që dyert dhe dritaret e shtëpisë t’i punonte me dorën e vet, të gjithë të afërmit e kishin kundërshtuar. Megjithatë, i bindur se mund t’ia dilte, kishte përvjelë mëngët dhe në fund kishte nxjerrë një rezultat mahnitës.
Mehmet Gollopeni, tash 79-vjeçar, tregon me shumë krenari se si më vonë do të bëhej sinonim i punës me dru, duke u njohur nga njerëz të kamur të asaj kohe, shkruan sot Koha Ditore.
“Ju thosha, blini ju dërrasat e unë i maroj dyert e dritaret. Ma bojshin ‘ik bre anej, don me i çu poshtë’. Ama unë i pata ndreq krejt vetë”, thotë Gollopeni nga Doberdelani i Suharekës, duke e kujtuar këtë si punën e parë serioze të tij më dru.
Fiks 170 oda ai do t’i vishte me dru, dhe madje jo vetëm në rajonin e Suharekës, por edhe më larg, deri në Has të Prizrenit, përcjell koha.net. Sot nuk mundet të punojë, por sa herë futet në punëtorinë e djalit të tij, i hapet fytyra nga aroma e drurit. Madje, ai ende sheh ëndrra duke punuar me dru.