Pesë muaj pasi tentoi të rrëmbejë tre persona nën thirrjet “Allahu Ekber”, Dijar Xhema do të gjykohet nga Krimet e Rënda për vepra me qëllime terroriste dhe kundërshtim të forcave të policisë.
Prokuroria thotë në mbyllje të hetimeve se 29-vjeçari nga Mitrovica vuan nga çrregullimet mendore dhe ky është shkaku pse ranë dyshimet ndaj tij edhe për 3 veprat e tjera për të cilat ishte nën hetim, raporton Top Channel.
Prokuroria i pushoi hetimet ndaj tij për dyshimet se i riu kishte kryer edhe propagandë me qëllime terroriste, nxitje e urrejtjes dhe prodhim e shitje e narkotikeve.
Aktualisht për Dijar Xhemen është vendosur masa e sigurimit personal shtrim i detyruar në psikiatri, vendim ky për të cilin prokurorët janë dakord që të aplikohet edhe në vijim.
I riu nga Mitrovica u arrestua në muajin gusht në qytetin e Vlorës .
Prokuroria thotë se teksa po udhëtonte me një automjet Dijar Xhema në tre momente të ndryshme ka tentuar të rrëmbejë tre persona duke thirrur “jam i dërguar i Allahut do t’ju vras të gjithëve” dhe “allahu ekber”.
Fillimisht thotë prokuroria me kërcënime dhe dhunë fizike, 29-vjeçari ka tentuar të rrëmbejë në mënyrë rastësore një shtetase, por disa persona e kanë shpëtuar vajzën.
Më tej ai ka vijuar të bëjë të njëjtin veprim në një lokal ndaj një klienti të cilin e ka dhunuar, veprim ky që është përsëritur edhe në episodin e tretë.
Gjatë tentativës për të nxjerrë nga automjeti personin e tretë, Dijar Xhema, thotë prokuroria, u arrestua nga policia lokale ndaj të cilës ai u shfaq agresiv.
