Misioni i SHBA-ve në OSBE i bën thirrje presidentit Ivanov të rishikojë vendimin e tij dhe të mundësojë që partitë që kanë siguruar shumicë në parlament ta formojnë qeverinë e re. Në komunikatë thuhet se misioni akerikan paralajmëron Ivanovin se vendimi i tij është jodemokratik dhe në kundërshtim me sundimin e të drejtës dhe parimet e OSBE-së, njofton Telegrafi Maqedoni.
“Së bashku me partnerët tanë në NATO dhe partnerët nga BE dhe SHBA, me vëmendje e ndjekim procesin e formimit të qeverisë së re në Maqedoni, pas zgjedhjeve të 11 dhjetorit. SHBA-të janë të shqetësuara që presidenti Ivanov refuzoi tu mundëson formimin e qeverisë së re përfaqësuesve që kanë shumicë në parlament. Ne theksojmë se ky vendim nuk është në pajtim me parimet e OSBE-së, parimet themelore demokratike dhe sundimin e së drejtës, që janë vlera themelore të kësaj organizate. Si partnerë strategjik dhe miq të Maqedonisë, si dhe duke respektuar sovranitetin, kërkojmë nga presidenti Ivanov ta rishikojë vendimin e tij. Gjithashtu, ju bëjmë thirrje liderëve politik dhe partive të përmbahen nga sulmet mbi organizatat dhe shoqëritë qytetare dhe të ndihmojnë të sigurohen kushte për punë të pavarur të institucioneve”, thuhet mes tjerash në kumtesë./Telegrafi/