Ditën e djeshme, kontingjenti i parë shqiptar u nis në operacionin ALTHEA në Bosnjë dhe Hercegovinë. Ky mision përbëhet nga 30 trupa, mes të cilave edhe një vajzë, dhe ata do të shërbejnë për rreth 6 muaj në Camp Butmir në Sarajevë.
Ministri i Mbrojtjes, Pirro Vengu u shpreh sot se “djemtë dhe vajzat e Forcave të Armatosura eksportojnë siguri dhe e konfirmojnë Shqipërinë si një aktor të rëndësishëm për stabilitetin në rajon”.
Ministri Vengu ka ndarë historinë e tetar Evis Dishanit dhe Major Lulzim Adilit, që janë dy nga 30 trupat e togës që udhëton në Bosnje Hercegovinës në kuadër të misionit EUFOR ALTHEA.
Komandanti i skuadrës së parë të kontingjentit EUFOR 1, Evis Dishani thotë se përzgjedhja e ushtarakëve është bërë në bazë të aftësive personale dhe profesionale të fituara ndër vite.
“Kam 12 vite eksperiencë në Forcat e Armatosura dhe ky është misioni i dytë që shërbej me uniformë.
Kemi rreth dy muaj që kemi filluar përgatitjen paradislokuese ku janë trajtuar temat në zbatim të detyrave që do kryejmë atje, si kontroll turmash dhe patrullim në gjithë territorin e Bosnjës dhe Hercegovinës. Deri tani them që trupat janë të përgatitura dhe do ja dalim mbanë”, shprehen tetar Deshani dhe major Adili.
“Trupat janë me moralin lart për ta kryer këtë mision. U bënë shumë vite që shërbejmë në këtë profesion dhe na është kërkuar shpesh që të angazhohemi në detyra të tilla. Është privilegj dhe përgjegjësi shumë e madhe të drejtosh 30 trupa në këtë mision. Fakti që e kam ndjekur vetë stërvitjen dislokuese më bën të mendoj që nuk do të kemi probleme”, thotë tetar Deshani në videon e shpërndarë në Facebook. /Telegrafi/