Qyteti i Minneapolis ka arritur një marrëveshje prej 27 milionë dollarësh me familjen e George Floyd – afro-amerikani i cili vdiq vitin e kaluar – pasi një polic ia vendosi gjurin në qafë për më shumë se 8 minuta kur i njëjti ishte arrestuar nga policia.
Sipas medieve të huaja, përcjell Telegrafi, ky incident ishte kapur nga kamerat, dhe pas këtij rasti, shkaktoi protesta në të gjithë botën. Floyd ishte bllokuar nga gjuri i oficerit të policisë, Derek Chauvin.
Avokatët e familjes thanë se pamjet krijuan “kërkesë të pamohueshme për drejtësi dhe ndryshim”.
Përzgjedhja e jurisë për gjyqin e Derek Chaucin është aktualisht në proces. Gjashtë nga 12 anëtarët e jurisë janë zgjedhur për seancat dëgjimore që do të fillojnë më 29 mars.
Këshilli i Qytetit të Minneapolis votoi unanimisht për të miratuar zgjidhjen paragjyqësore, më i madhi i dhënë ndonjëherë në shtetin e Minesotës. /Telegrafi/