Ministrja e Industrisë, Ndërmarrësisë dhe Tregtisë, Rozeta Hajdari ka thënë se rritja e çmimeve të produkteve ushqimore në Kosovë ka ndodhur për shkak të rritjes së inflacionit dhe importit.
Hajdari duke diskutuar në “Fol Hapur”, ka thënë se Kosova nuk mund t’i kontrolloj çmimet.
“Departamenti i Tregut ka sjellë konkludimet se këto rritje të çmimeve janë për arsye të rritjes së inflacionit nga kriza botërore e pandemisë COVID-19 dhe siç e dini në Kosovë janë 90 për qind të mallrave import, ku kryesisht është konsumi familjar dhe këto janë situatat që i kemi si vend importues”, tha Hajdari, shkruar Telegrafi.
Sipas saj, Kosova është 90 për qind importuese dhe se nuk mund të ketë kontroll.
“Ne nuk mund t’i kontrollojmë çmimet kur jemi 90 për qind importues të mallrave. Çfarë mund të bëjmë është me Task Forcën për mbrojtjen e tregut, ne mund ta mbrojmë konkurrencën e shtetit tonë që mos të lejohet që kartelet e ndryshme të mos lejohet rritja e çmimeve”, shton ajo.
Hajdari në këtë diskutim ka thënë se leximi i dytë i Projektligjit për Tregtinë me Jashtë do të ndihmojë vendosjen e reciprocitetit ndaj Serbisë.
Megjithatë ajo tha se do të bëhet një analizë e mirëfilltë para çdo veprimi. /Telegrafi/