Ministri i ekonomisë Driton Kuçi sot është takuar me drejtorin e Zyrës së Bankës Botërore në Maqedoni, Marco Mantovanelli, transmeton Telegrafi Maqedoni.
Siç njoftojnë nga Kabineti i Ministrisë, në këtë takim theks i veçantë është vënë mbi bashkëpunimin e suksesshëm të Ministrisë së ekonomisë dhe Bankës botërore që ka rezultuar me realizimin e shumë projekteve në sferën e efikasitetit energjetik dhe në sferën e turizmit.
Ministri Kuçi e ka falënderuar drejtorin e ri të Zyrës së Bankës Botërore në Maqedoni, Mantovanelli për mbështetjen e vazhdueshme që ky institucion jep për vendin, ndërsa ka propozuar që bashkëpunimi në të ardhmen të vazhdojë me mundësi për realizimin e projektit të autostradës Shkup-Bllacë, i cili është i dobishëm për Maqedoninë dhe Kosovën, për qytetarët dhe bizneset e dy vendeve, dhe sidomos për bizneset që veprojnë në Zonën Industriale të Vizbegut, ku punojnë mbi 5 mijë njerëz dhe ka qarkullim qindra milionësh në nivel vjetor.
Drejtori i Zyrës së Bankës Botërore në Maqedoni, Mantovanelli ka thënë se bashkëpunimi me Ministrinë e ekonomisë dhe me institucionet tjera në vend ka qenë shumë i frytshëm, duke realizuar projekte në sferën e energjetikës, turizmit, konkurrueshmërinë e kompanive, zhvillimin e komunave dhe projekte tjera.
Mantovanelli po ashtu ka theksuar se në shtator do të përpilohet edhe programi për projektet që do të realizohen në periudhën e ardhshme, ku mund të mbështeten projekte nga fushat e përmendura./Telegrafi/