Sjelljet e ministrave serbë në Qeverinë e Kosovës, të cilët vazhdojnë t’i duartrokasin thirrjeve “Kosova është Serbi”, për deputeten e LDK-së Vjosa Osmani është e papranueshme.
Madje, ajo kërkon nga institucionet e vendit, që t’i marrin seriozisht rastet e tilla dhe të kërkojnë nga ministrat serbë, që sjelljet e tyre të jenë në përputhje me Kushtetutën dhe ligjet e vendit dhe të mos vazhdojnë një injorim total të shtetit të Kosovës, ashtu siç kanë bërë deri më tani.
Megjithatë, Qeveria nuk ka ndonjë qëndrim konkret për këtë sjellje të anëtarëve të saj që vijnë nga Lista Serbe dhe se në shumë raste e përdorin fjalën “Kosmet” në vend të Kosovës.
Reagimi Osmanit ka ardhur pas publikimit të një videoje nga KosovaPress ku tre anëtarë të kabinetit të Qeverisë së Kosovës nga komuniteti serb, në një solemnitet të organizuar në veriun e Mitrovicës, shihen duke duartrokitur derisa pjesëmarrësit që janë tifozë të ekipit të reprezentacionit serb në vaterpolo brohorasin “Kosova është zemra e Serbisë”.
Në këtë solemnitet shihet se kanë marrë pjesë zëvendëskryeministri i Kosovës, Branimir Stojanoviq, ministri i Pushtetit Lokal, Lubomir Mariq, dhe ministri për Kthim dhe Komunitete, Dalibor Jevtiq.
Deputetja Vjosa Osmani thotë për KosovaPress, se sjellja e ministrave serb nuk përbën befasi, për cilindo që ka përcjellë aktivitetin e ministrave që vijnë nga Lista Serbe, duke pasur parasysh lojalitetin e vazhdueshëm, që ata kanë treguar ndaj shtetit fqinj Serbisë. Ndërsa thotë se përfundimisht ka ardhur koha, që institucionet e vendit të kërkojnë nga ministrat në fjalë, që të sillen në përputhje me Kushtetutën dhe ligjet e vendit.
E, Arban Abrashi, zëdhënës i Qeverisë së Kosovës thotë se Qeveria e Kosovës, nuk ka një qëndrim konkret rreth kësaj që ka ndodhur në veri të Mitrovicës. Ndërsa, thotë se duhet të punohet më shumë në marrëdhëniet ndëretnike dhe përmirësimin e tyre.
