Një miliarder rus, i cili thuhej se kishte lidhje me inteligjencën e jashtme të Moskës, vdiq në një përplasje misterioze helikopteri “pasi një tjetër pasagjer anuloi fluturimin në minutën e fundit”.
Sipas mediave të huaja, përcjell Telegrafi, biznesmeni Vyacheslav Taran, 53 vjeç, mbeti i vdekur në përplasjen pranë fshatit Eze, pasi u nis nga Lozana, Zvicër.
Dhe në aksidentin e ndodhur në Alpes-Maritimes, në juglindje të Francës, ka humbur jetën edhe një pilot francez 35-vjeçar.
Në bord supozohej të ishte një pasagjer tjetër, por në mënyrë misterioze ia anuluan në minutën e fundit.
Aksidenti ndodhi rreth orës 13:00 të 25 nëntorit, raportoi Monaco Daily News, kur helikopteri me një motor Eurocopter EC130 (H130) i drejtuar nga Monacair u rrëzua pranë Monakos.
Zëvendës Prokurori Publik i Nice ka vizituar vendin e aksidentit dhe ka thënë se nuk mund të përjashtohet faji i palës së tretë.
Ndërsa ambasada ruse në Francë vuri në dukje se përplasja ka ndodhur pranë qytetit të Villefranche-sur-Mer.
Taran ishte themeluesi i platformës së tregtimit dhe investimeve Libertex dhe Forex Club.
Megjithatë, është pretenduar se ai kishte lidhje me inteligjencën e jashtme të Rusisë.
Agjencia ukrainase e lajmeve UNIAN e përshkroi atë si një “biznesmen kripto-miliarder me lidhje të mundshme me Shërbimin e Inteligjencës së Jashtme Ruse”.
Raporti pretendonte se Taran ishte i lidhur me agjencinë e huaj të spiunazhit SVR dhe ishte përgjegjës për “pastrimin e fondeve ruse përmes një sistemi të operacioneve të kriptomonedhave”.
Ndërkohë kanali rus Telegram pro-luftës Marat Bashirov e titulloi aksidentin si një operacion “pastrimi”.
Taran ishte i martuar me gruan ruse Olga, themeluese e medias Hello Monaco dhe çifti kishte tre fëmijë. /Telegrafi/