Shpërthimet vdekjeprurëse në koncertin e Ariana Grandes në Manchester Arena, përveç viktimave dhe të plagosurve, kanë bërë që shumë fëmijë – fansa të këngëtares, të mbesin rrugëve, si pasojë e kaosit të krijuar në qytetin e Mançesterit.
Fansat e rinj të tmerruar, pasi kanë ikur nga koncerti, nuk kanë mundur të shkojnë nëpër shtëpitë e tyre, duke qenë se janë anuluar të gjitha linjat e trenave dhe tramvajeve.
Banorët e Mançesterit kanë reaguar menjëherë për t’u dalë në ndihmë duke ua ofruar shtëpitë e tyre për të qëndruar.
Në rrjetet sociale menjëherë është krijuar hashtagu #roomformanchester për t’i ndihmuar fëmijët që po përjetojnë momente të vështira.
Autoritetet kanë bërë të ditur se qindra fëmijë tashmë janë vendosur në hotele dhe do të mbahen të sigurt derisa t’i marrin prindërit e tyre. /Telegrafi/
