Kryetari i opozitës maqedonase Hristijan Mickoski, në konferencë për shtyp tha se aktorët kryesor për rastin e fundit që e hapi Prokuroria Themelore, janë pjesë e pushtetit dhe partisë LSDM.
Ai akuzoi pushtetin se është në mbrojtje të siç tha, krimeve të Prokurorisë Speciale, ndërsa kërkoi që për Katica Janevën të shqiptohet masa e paraburgimit, njofton Telegrafi Maqedoni.
“Jemi dëshmitarë të aferës, rrënjët e së cilës shkojnë përtej dy figurave të njohura në opinion. Dje ishim dëshmitarë të një krimi të udhëhequr nga LSDM. Nuk ka qytetar që mendon se kjo është e mundur pa mbështetje institucionale dhe nga pushtetit. Për këtë arsye, ajo që ndodhi mbrëmë është vetëm teatër për t’u shpëtuar aktorët politik dhe Katica Janeva. E pamë se çfarë kryeministri ka shteti, i cili për 5 sekonda futet në tregti për çështjen e kishës”.
“Para 4 muajve kam paralajmëruar për krimet e PSP-së, që janë mbështetur nga pushteti. Kryeministri Zaev u vendos në mbrojtje të Katica Janevës dhe ajo ishte vija e kuqe e tij, prej së cilës nuk heq dorë. Dorëheqja e Janevës ishte e kushtëzuar, dorëheqja e saj nuk është se bëhet fjalë për person të përgjegjshëm, por se është zhytur në krim. Janevës iu konfiskua vetëm telefoni dhe nuk iu shqiptua asnjë masë, pa marrë parasysh lidhjen që ajo ka me këtë rast. Rasti i djeshëm ishte vetëm teatër, për të shpëtuar aktorët kryesor. Dyshimi im është se në gjithë këtë janë të përfshirë persona të pushtetit të njohur si Friki dhe Kiki”, tha mes tjerash Mickoski.
Ai tha se në takimin të cilin e njoftoi kryeministri Zoran Zaev, nuk do të merr pjesë, pasi siç tha, nuk do të diskutohet për atë që sipas tij, më së shumti i duhet vendit, zgjedhjet e parakohshme parlamentare./Telegrafi/