Kryetari i partisë opozitare OBRM-PDUKM, Hristijan Mickoski në intervistën e tij të sotme në RTVM tha se njëri nga skenaret në veprimin e tyre në të ardhmen do të jetë përgatitja e Ligjit për amnisti për të burgosurit për ngjarjet e dhunshme të 27 prillit në Kuvendin e Maqedonisë. Ai paralajmëroi se së shpejti do të kumtohen hapat e rradhës të partisë, ndër të cilat edhe veprimi i deputetëve, duke theksuar se për këtë çështje ka debat serioz në parti.
Ai theksoi se konstruktiviteti i OBRM-PDUKM-së nuk guxon të vendoset në dyshim dhe tha se ai konstruktivitet duhet të jetë i dyanshëm.”Si grup parlamentar duhet të dallojmë se edhe në anën tjetër ka konstruktivitet të dyanshëm”, tha Mickoski.
Sipas Mickoskit, gjatë periudhës në vijim do të ofrojnë politika dhe qasje të reja të cilat përshtaten me ideologjitë e një partie bashkëkohore të djathtë dhe se motoja e veprimit të tij në të ardhmen do të jetë bashkimi, që do t’i afrojë për të qëndruar përballë politikave të dëmshme në shtet./Telegrafi/