Presidenti i Republikës së Shqipërisë, Ilir Meta në takimin e sotëm në Tiranë me ministrin e kulturës të Maqedonisë, Asaf Ademi, duke uruar 27 vjetorin e pavarësisë së Maqedonisë, uroi referendum të suksesshëm më 30 shtator, përcjell Telegrafi Maqedoni.
“Uroj që 1 tetori të hap perspektivë të re në integrimin evropian dhe euro-atlantik të Maqedonisë, për një ardhmëri më të mirë për të gjithë qytetarët e vendit”, deklaroi Meta. Ai e përshëndeti përparimin e arritur nga Maqedonia, veçanërisht në lidhje me “çështjet kyçe që kërkojnë guxim dhe vendosmëri të madhe politike dhe shtetërore”.
Meta e vlerësoi bashkëpunimin dypalësh mes dy shteteve, me besim se agjenda e dakorduar mes dy qeverive në takimin e Pogradecit do të zbatohet nga të dy shtetet. Ai shtoi se faktori shqiptar në Maqedoni ka mundësi të re për të dëshmuar qasjen e paluhatshme për integrimin e vendit duke u angazhuar me tërë energjinë për suksesin e referendumit të 30 shtatorit./Telegrafi/