Presidenti, Ilir Meta, ka uruar Shtetet e Bashkuara për pavarësinë përmes një postimi në Facebook.
Kreu i shtetit shqiptar uroi të gjithë komunitetin shqiptar që jeton në SHBA duke thënë se kontriubojnë fuqishëm për të përforcuar lidhjet dhe marrëdhëniet shqiptaro-amerikane.
“Një rast i mirë sot në veçanti për të uruar të gjithë komunitetin e mrekullueshëm shqiptar që jeton në SHBA dhe që kontribuon fuqishëm për të përforcuar lidhjet dhe marrëdhëniet tona në të gjitha fushat, në mënyrë që raportet shqiptaro-amerikane t’i shërbejnë jo vetëm interesave reciproke strategjike, por edhe rritjes së kredencialeve demokratike të Shqipërisë si vend anëtar i NATO-s, që në zemrën e saj ka demokracinë, por edhe si një vend i denjë për të çelur negociatat për anëtarësim me BE në 18 tetor 2019”, shkroi Meta.
Meta tha se shqiptarët e Amerikës sot nuk ndihen të lumtur me krizën që ka përfshirë Shqipërinë.
“Shqiptarët e Amerikës sot nuk ndihen të lumtur me krizën pa rrugëdalje ku ndodhet vendi ynë. Ndaj bëjnë thirrje për reflekim dhe përgjegjshmëri”, shkroi Meta duke shpërndarë një artikull të shkruar nga Frank Shkreli, ish-drejtor i Zërit të Amerikës.