Presidenti i Republikës së Shqipërisë, Ilir Meta është shprehur sot se mbështet shqetësimin e konfederatës së industrive shqiptare, Konfindustria, që i bën thirrje qeverisë që të ndërpresë menjëherë çdo nismë që synon të rrisë tarifat e koncesionit të metrologjisë së karburanteve.
Sipas Metës, koncesioni pritet të shtrenjtoje çmimin e karburanteve në Shqipëri, dhe parashikohet t’i kushtojë biznesit dhe qytetarëve 70 milionë euro më shumë, nga vlera prej 140 milionë eurosh e koncesionit.
Ai ka shtuar se është shprehur me parë kundër këtij koncesioni nëpërmjet një dekreti.
Në një njoftim për shtyp, Konfindustria i kërkon Kryeministrit Edi Rama “të ndërhyjë për të ndërprerë çdo nismë absurde të agjencive ekzekutive, që do të shtrenjtojë më tej çmimet e karburanteve”.
Ndërkohë, çmimet e karburanteve kanë arritur nivelet më të larta historike në mbi 200 lekë [1.63 euro] për litër në javën e parë të marsit si dhe pritet të ketë rritje të mëtejshme.
Gjithashtu, Konfindustria i kërkon Ramës të vlerësojë seriozisht dhe me shpejtësi uljen e barrës fiskale të karburanteve që shkojnë deri në 60% të çmimit përfundimtar dhe të mbështesë ngritjen e Entit Rregullator të Karburanteve.
“Çmimet historike të larta të karburanteve në vlerë absolute dhe krahasimtare me rajonin dhe më gjerë si dhe cilësia jashtë standardit e tyre kanë një ndikim shkatërrues afatgjatë për biznesin, industritë dhe ekonominë kombëtare, duke shkuar në përfitim të drejtpërdrejtë të karteleve, korrupsionit dhe grabitjes së taksave të shqiptarëve”, ka shtuar Konfindrustria. /Telegrafi/
