Presidenti i Shqipërisë Ilir Meta tha se kriza politike në vend është thelluar. Pas një aktiviteti në Universitetin “Zoja e Këshillit të Mirë”, kreu i shtetit shqiptar i pyetur nga gazetarët tha se palët politike nuk duhet të fshihen pas ndërkombëtarëve. Sipas tij, kriza duhet të zgjidhet me dialog dhe jo me pazare politike.
“Ka nevojë për një reflektim, është për të ardhur keq që palët politike kanë nxituar duke thelluar krizën. Klasa politike shqiptare duhet të marrë përgjegjësitë e saj dhe nuk duhet të fshihet pas asnjë ndërkombëtari siç ka ndodhur deri tani dhe çështjet duhet të zgjidhen me dialog larg pazareve, qoftë edhe të ndërkombëtarëve”, deklaroi Meta.
I pyetur për raportin e SHISH për rritjen e influencës ruse në Shqipëri, Presidenti tha se kjo nuk duhet të përdoret si shkak për krizën politike në vend.
“Ne jemi të ndërgjegjshëm për ndikimet e Rusisë në rajonin tonë. Ne do donim që Rusia të respektojë zgjedhjen e gjithë popullit të rajonit për t’u integruar në NATO, por nuk duhet ta katandisim rrezikun rus si rrezikun anglo-amerikan të periudhës së kaluar për të fshehur krizën politike e cila është krijuara nga ne”, theksoi Meta. /Telegrafi/