Presidenti i Shqipërisë Ilir Meta, i cili ndodhet në Gjermani për një vizitë zyrtare, ka komentuar për “Deutsche Welle” zhvillimet politike në Shqipëri.
Djegien e mandateve të opozitës, e quan veprim ekstrem që nuk i shërben integrimit të vendit. Por, Ilir Meta thotë se ka ardhur koha të kemi një hap prapa nga opozita dhe dy hapa prapa nga mazhoranca, pasi ajo është përgjegjësja kryesore për qeverisjen e vendit.
“Vlerësoj se çdo veprim ekstrem nuk i shërben demokracisë, nuk i shërben forcimit të institucioneve dhe nuk i shërben njëkohësisht as integrimit europian të vendit, që është dëshira e çdo qytetari shqiptar. Dhe me këtë është e lidhur edhe shpresa për të mos e shpopulluar më tej vendin tonë, sidomos nga të rinjtë dhe forcat më krijuese të tij. Është koha të kemi një hap prapa nga opozita, por mendoj që është koha të kemi edhe dy hapa pas nga mazhoranca, nga qeveria dhe nga Kryeministri, të cilët duhet të kuptojnë që përgjegjësitë kryesore për qeverisjen e vendit janë të tyre. Është detyra e tyre të japin shembullin të parët në respektimin e Kushtetutës dhe të kufijve që Kushtetuta e Republikës së Shqipërisë i ka përcaktuar qeverisë. Të respektojnë institucionet e pavarura, të mos ndikojnë te krijimi i institucioneve të reja të drejtësisë”, është shprehur Ilir Meta nga Berlini.
Në lidhje me protestën, Presidenti Meta ka thënë se dhuna e shfaqur është një zhvillim i padëshiruar.
“Përshkallëzimi i protestave apo i politikave ndarëse, akoma më keq konfrontuese, sidomos jashtë institucioneve, është një zhvillim i padëshiruar, ndërkohë që mbeten pak muaj që vendet anëtare të Bashkimit Europian të shprehen edhe një herë për mundësinë e hapjes së negociatave për anëtarësim të vendit. Kështu që është momenti për të reflektuar të gjitha palët, për të pasur një qasje tjetër jashtë konfrontimeve të padëshiruara”, ka thënë presidenti Ilir Meta. /Telegrafi/