Kreu i SNSD-së dhe anëtari i Presidencës së Bosnje-Hercegovinës, Milorad Dodik pati një fjalim mjaft të çuditshëm në një seancë speciale të Kuvendit të Republikës Serbe dhe si hyrje përdori fjalimin e ish-kryeministrit britanik, David Cameron, i cili njoftoi daljen e vendit nga BE-ja.
Në fillim të fjalimit të tij, Dodik tha se “Republika Serbe nganjëherë konsiderohet një anëtare grindavece”.
“Ne kemi karakterin e një populli të lirë. Unë nuk dua një marrëveshje më të mirë vetëm për Republikën Serbe, dua një marrëveshje më të mirë edhe për Bosnje dhe Hercegovinën”, tha Dodik.
Pas kësaj, Dodik tha se gjithçka që kishte lexuar më parë ishte fjalimi i parafrazuar i David Cameronit, ish-kryeministrit të Britanisë së Madhe, raporton klix.ba.
“Këtë fjalim ai e mbajti në vitin 2013 dhe kështu shpalli BREXIT. Vetëm në këtë fjalim unë zëvendësova Britaninë e Madhe me RS dhe Bosnjën dhe Hercegovinën me Bashkimin Evropian”, përfundoi Dodik.
Dodik njoftoi gjithashtu një referendum mbi kushtetutën e re të entitetit të Republikës Serbe. /Telegrafi/