Lideri opozitar rus, Aleksei Navalny, gjashtë muaj pasi u helmua, është nisur nga Gjermania drejt Rusisë.
Pas arritjes në vend, ai mund të përballet me arrestim.
“Unë, të arrestohem? Unë jam i pafajshëm”, tha Navalny për gazetarët para se të hipte në avionin e kompanisë Pobeda.
Nalvalny një nga kritikët më të zëshëm të presidentit rus Vladimir Putin, njoftoi këtë vendim të mërkurën, për t’u kthyer nga Gjermania – duke thënë se i mungonte Moska dhe u shpreh se nuk i interesonte për ato që ai i quajti çështje të reja të fabrikuara kriminale kundër tij.
Njoftimi i Navalnyt vjen një ditë pasi Shërbimi Federal i Burgjeve i Rusisë (FSIN), ka kërkuar që ai të zëvendësojë dënimin me kusht në çështjen Yves Rocher me burgim efektiv.
Përpjekjet e mëparshme të FSIN-it për të rrëzuar dënimin me kusht të Navalnyit dhe burgimin e tij, ishte refuzuar nga një gjykatë në Moskë në vitin 2017.
Ai u sëmur gjatë një fluturimi nga Tomsk për në Moskë, në gusht të vitit 2020 dhe u vendos në një gjendje kome në një spital në Siberi, para se të transferohej në Gjermani.
Testet laboratorike të kryera në Gjermani, Francë dhe Suedi kanë vërtetuar se Navalny ishte helmuar me një agjent nervor të klasës Novichok, një rezultat i konfirmuar edhe nga Organizata Ndërkombëtare për Ndalimin e Armëve Kimike.
Pas helmimit të tij, Bashkimi Evropian vendosi sanksione ndaj gjashtë zyrtarëve rusë dhe një instituti kërkimor shtetëror.
Ai ka akuzuar Putinin, për urdhërimin e helmimit, një pretendim i hedhur poshtë nga Kremlini.
Mbështetësit e tij thanë se do ta presin Navalnyn në aeroportin Vnukovo të Moskës. /Telegrafi/