Pronari i “Hib Petrol”, njërës prej kompanive më të mëdha në Kosovë për shitjen e naftës, Ibrahim Brucaliu, tha për Telegrafi.com, se sigurisht që pasojat e flakëve që përfshinë rafinerinë do të ndihen në Kosovë.
“Mbi 90 përqind e naftës në Kosovë vjen nga kjo rafineri. Pas lajmit që mora për djegjen e rafinerisë, jam interesuar tek pronarët e kompanisë dhe jam informuar për pasojat që kanë pasur nga zjarri. Më thanë që ka pasur pasoja në sektorin e prodhimit dhe përpunimit të naftës, por se depozitat e rafinerisë nuk janë prekur nga zjarri”, tha Brucaliu.
Sipas tij, furnizimi me naftë dhe derivative të tjera të Kosovës nga kjo kompani gjithashtu janë në rrezik nga greva që ka vazhduar që prej një javësh në rafinerinë OKTA.
“Ka një javë që tregu i Kosovës nuk ka marrë asnjë pikë naftë nga kjo kompani për shkak të grevës që është duke u bërë atje. Ne jemi duke u furnizuar për momentin nga Greqia sepse kemi kontratë me kompani atje, por furnizimet nga ky shtet janë më të shtrenjta dhe për shkak të rënies së vazhdushme të çmimit askush nuk dëshiron të shesë në këtë kohë. Furnizimi nga Mali i Zi dhe Shqipëria paraqet problem në këtë kohë për shkak të motit dhe rrugëve malore. Në Bullgari derivatet e naftës kushtojnë më shtrenjtë për së paku 5 cent. Mund të paraqiten vështirësi të ndryshme në treg”, tha Brucaliu. /Telegrafi/