Në pikë kalimin kufitar në Morinë janë mbledhur disa mërgimtarë për t’i pritur trupat e pajetë të 10 personave, të cilët humbën jetën në aksidentin e së dielës në Kroaci.
Megjithëse nuk dihet saktë ora se kur pritet të arrijnë trupat e pajetë, ardhjen e tyre në orët e mëngjesit të së mërkurës e ka paralajmëruar mbrëmë ministri i Punëve të Brendshme të Kosovës, Xhelal Sveçla.
E për t’i nderuar viktimat e aksidentit të së dielës në Kroaci, disa mërgimtarë që ndodhen aktualisht në Kosovë kishin dalë për t’i pritur në pikëkalimin kufitar Morinë.
Një mërgimtar në një deklaratë për Kanal10 tha se jeton në Gjermani që 22 vjet dhe ka dalë për t’i nderuar viktimat dhe shprehur ngushëllime familjarëve të viktimave.
“Nga mëngjesi kam ardhur për t’i pritur trupat dhe nderuar… Vet e marr këtë rrugë, çdo verë, dy tri herë në vit e di çka është dhimbja e vendlindja”, tha ai.
Ai tha se në Kosovë ka raste kur vjen me veturë, autobus e aeroplan.
“Kësaj radhe kam ardhur me makinë, me familje”, tha ai. /Telegrafi/