Djemtë e themeluesve të Ushtrisë Çlirimtare të Kosovës, Hashim Thaçit, Sami Lushtakut e Kadri Veselit, janë fotografuar bashkë në një lokal në Prishtinë.
Deputeti i PDK-së, Mërgim Lushtaku, shihet me djalin i Thaçit, Endritin dhe djalin e Veselit, Klestorin.
Në një postim në llogarinë e tij në Facebook, Lushtaku ka thënë se është përgjegjësi e madhe të jesh pasardhës i themeluesve të UÇK-së.
“Është përgjegjësi e madhe të jesh pasardhës i themeluesve të Ushtrisë Çlirimtare të Kosovës, por njëkohësisht ndihemi krenarë që jemi pasardhës të ÇLIRIMTARËVE! #LiriaKaEmër”, ka shkruar ai.
Ndryshe, Thaçi e Veseli ka më shumë se një muaj që gjenden në paraburgim në Hagë, pas konfirmimit të aktakuzave ndaj tyre për krime lufte.
Bashkë me ta janë edhe ish-kryeparlamentari i Kosovës, Jakup Krasniqi, shefi i Grupit Parlamentar të Vetëvendosjes, Rexhep Selimi, ish-krerët e OVL-UÇK-së, Hysni Gucati e Nasim Haradinaj dhe ish-eprori i UÇK-së, Salih Mustafa, njofton Telegrafi.
