Mentor Zhdrella ka njoftuar se nuk do të jetë më drejtor sportiv i Llapit nëpërmjet një postimi në facebook.
Postin e drejtorit sportiv te Llapi e mbajti për një vit e gjysmë. Ai u emërua drejtor sportiv në qershor të vitit 2023 pas pensionimit si futbollist.
“Dua t’ju njoftoj se sot, më 20 janar 2025, kam vendosur të largohem nga posti i Drejtorit Sportiv të KF Llapi për arsye personale”.
“Gjatë këtij një viti e gjysmë, kam dhënë maksimumin për të kontribuar në drejtimin e klubit dhe për ta mbajtur atë në rrugën e duhur drejt përmbushjes së objektivave. Ka qenë një rrugëtim i mbushur me sfida, por edhe me momente të veçanta dhe suksese të arritura që do t’i kujtoj gjithmonë me krenari”, ka shkruar Zhdrella, që tutje ka falënderuar edhe presidentin Beqir Batatina dhe trajnerin Tahir Batatina, si dhe për të gjithë pjesëtarët e stafit të klubit.
Tutje, ai ka falënderuar edhe lojtarit e Llapit, duke shtuar se ka qenë krenar që ka punuar me ta.
“Mbi të gjitha, falënderoj secilin futbollist të KF Llapi për përpjekjet dhe përkushtimin e tyre në fushë. Ju, futbollistët, jeni krenaria e vërtetë e këtij klubi, dhe unë jam krenar që pata mundësinë të punoj me ju”.
“Kjo përvojë si Drejtor Sportiv ishte e para për mua, dhe ajo jo vetëm që do të mbetet e paharrueshme, por do të jetë një bazë e fortë për të ardhmen time profesionale. Kam mësuar shumë dhe jam i sigurt se këto mësime do të më ndihmojnë në çdo hap të rrugëtimit tim të ardhshëm. Faleminderit të gjithëve për mbështetjen, bashkëpunimin dhe momentet e paharrueshme që kemi ndarë së bashku. KF Llapi do të mbetet gjithmonë një pjesë e rëndësishme e jetës sime”, ka shkruar Zhdrella.
Zhdrellaka qenë ndër lojtarët më të mirë në Kosovë, ndërsa edhe në punën e drejtorit sportiv, ka treguar sukses te Llapi, ku sezonin e shkuar ishin afër titullit të kampionit./Telegrafi/
