Gzim Rusi është shndërruar person ‘non-grata’ për Lirinë e Prizrenit. Sulmuesi i Gjilanit e kishte lënduar rëndë në sy futbollistin e Lirisë, Albin Memaj, gjatë ndeshjes ndërmjet këtyre dy skuadrave.
Rusi kishte përdorur bërrylin dhe kishte goditur rivalin e tij, i cili përfundoi në spitalin rajonal të Gjilanit, ku vazhdon ende të marrë tretmanin mjekësor.
Përderisa Rusi pohon se goditja ka qenë e paqëllimshme, te Liria insistojnë se ajo ishte e qëllimshme dhe për më shumë, ankohen se kanë përjetuar ‘ferrin’ dje në Gjilan.
Kjo ka acaruar prizrenasit sa që sot nuk e kanë lejuar Rusin që ta vizitojë Memajn në spital.
Gazetasheshi.com merr vesh se Rusi ka shkuar në spital t’i kërkojë falje Albin Memajt, teksa ky i fundit e ka kthyer mbrapshtë duke i thënë se nuk ke çfarë kërkon këtu. Mësohet se sot nuk është lejuar as kryesia e Gjilanit që ta vizitojë futbollistin e Lirisë.
Ndërkohë, Liria ka falënderuar stafin mjekësor për përkujdesjen maksimale ndaj futbollistit.